Deungoe lón kisah khabaran zameun
Masa kerajèun Saidil Ambia
Masa kerajèun Nabi Sulaiman
Yang mat hukuman ban sigom donya
Nibak siuroe nabi jak meuen
Deungon angen sajan seureuta
Nabi neuduek ateuh kurusi
Angén bapot lé ban siklep mata
Oh ban saré troh bak saboh teumpat
Neupiyóh siat neugantoe raja
Nabi tanyong nibak dum cicem
Toh siri katem lon boh keu raja
Seu-ot jampok tuanku ampon
Nyoepat aneuk lón neubóh keu raja
Sabab aneuk lón rupa ceudah that
Lagi ngon hibat lé bulé mata
Mata bulat babah meukawet
Cit got that sabet menyoë jih raja
Nabi Sulaiman teuseungéh teu khem
Dum cicem laën jikhem meubura
Malé geuthat-that di tgk. jampok
Teuduek-duek teuseupók meublek-blek mataJampok ka malé teutap ji-iem droë
Sampo ëan jinoë sabé jipeukra.
Teuma teuka burujuek balé
Han kutem diké jampók keu raja
Teuma lom teuka poé cicem müróng
Jigróp-róp lambong jicoh lam mata
Teuma lom meusu poé cicem tiong
Han ako dilón meujih keu raja
Seudang beuragoe yang leubeh tari
Kupiah haji ngon tupi waja
Teuma jimeusu cicem keutók-tók
Meuhanjeut jampok bah lon keu raja
Karena bak lón lé that piasan
Lón péh canang prang oh malam jula
Teuma seuót cicem raja ngang
Jaroë dijulang ateuh jeumala
Ampon Tüanku meuribé ampon
Galak that dilón gop nyan keu raja.
Kareuna gop nyan lé that mainan
Geupeh canang prang oh malam jula
Geureuduk tampi yang péh canang prang
Tadeungo meugramgram ban saboh dónya
Teuma jimeusu tók-tók beuragoë
Hana meusoè-soè taboh keu raja
Sedangkan dilón kupiah beusoe
Hana si uroë lakè keu raja
Teuma jidaméi oleh keulidi
Si rajawali tabóh keu raja
Tok-tok beuragoe tabóh keu waki
Tabóh keurani poë cicem pala
Leuek bangguna tabóh bupati
Si mirahpati jeut keu wedana
Kleung puteh ulee jeuet keu peulisi
Kepala nanggri aneuek ngang dama.
Tabóh keu hakim cicem paikoe
Poé aneuk tuló hakim agama
Keu penerangan poé cicem subang
Aneuk cangguek blang kepala tentera
Cicem peureuleng ke keuchik gampong
Cicem semantong keu ureung runda
Poé teuteut pangeu jeut ke peubantu
Cicem mirahrueng guru sikula
Kisah poe jampok lon piyoh siat
Jinoe lón sambat keu cicem paya
Cicem bruekbruek jeut keu mak bidan
Seubab digop nyan geukuwaa-kuwa.
Referensi:
“Lagu–Lagu dari Orkes Djeumpa Atjeh” Djilid I Cetakan II, diterbitkan oleh H. Razali Djuned, pegawai Kantor Urusan Agama Kotamadya Banda Atjeh. Dicetak oleh Pertjetakan Negara, Banda Atjeh, 1967.
